Praveena - தன்னம்பிக்கை, சமூகம்,இயற்கை கவிதைகள் - Praveena Thangaraj Novels Forum

🐘 வாரணம் நாங்கள் எங்கே செல்ல…? 🐘

Praveena Thangaraj — Thu, 26 Jun 2025 08:48:39 +0000

இதோ இங்கு தான் இருந்தன
இவ்விடம் தான் என்பதும் யாம் அறிவேன்
இன்று ஏனோ எங்களை விரட்டுகின்றார்கள்
இது மனிதர்கள் இருக்குமிடம் என்றே
ஓங்கி வளர்ந்த என் தாயின் கிளைகளை
வெட்டி வீழ்த்தியே ஊனமாக்கினார்கள்
பச்சைபட்டாடை என்றே திகழந்த உடைகளை
வேரோடு அபகரித்து வன்முறை செய்தாயிற்று
காணும் இடமெல்லாம் பூத்த முல்லைப்பூ
காணாமல் போனது
நாங்கள் பிளிறிற்று
கூடி பருகிய ஆற்றோடை நீர்கள்
கண்ணனுக்கு எட்டிய வரை காணவில்லை
இதில் எங்களை அவர்கள் இருக்கும் இடத்தில்
வந்து அச்சுறுத்துகின்றோம் என்ற பெயர் வேறு
இதோ வாரணம் எல்லாம் ஒன்று திரட்டி
கூண்டுக்குள் ஏற்றி விட்டார்கள்
அவர்களை போலவே கை ஏந்தி
யாசகம் கேட்டிடும் இழிவு நிலைக்கு தள்ளி...
காடு இடுகாடு ஆனதேனோ?!
--பிரவீணா தங்கராஜ்.
வாரணம்-யானை
இடுகாடு-சுடுகாடு

அன்பைத்தேடி

Praveena Thangaraj — Thu, 20 Jun 2024 14:37:27 +0000

*அன்பைத் தேடி*

நிலையற்ற பிரபஞ்சத்தில்

நிலையான அன்பைத்தேடி

முரண்பாட்டான கவிதையென்று

முதலடி நாடி சிறகுவிரிக்கின்றது

இதயச்சிறையில் வீற்றிருக்க

இருவிழி நயனத்தில்

அன்பென்ற மௌனமொழி

அடைப்பெடுத்து ஆர்பறிக்க,

தன்னருகே தோள்தட்டி

தஞ்சமென மனயெட்டில்

தாங்கிடவே தேடிகின்றேன்

அன்பெனும் தேடுதலில்...

-பிரவீணா தங்கராஜ்

முட்டாள்

Praveena Thangaraj — Thu, 20 Jun 2024 14:18:43 +0000

முட்டாள் - Praveena Thangaraj Novels

நல்லதே நினை

Praveena Thangaraj — Thu, 20 Jun 2024 14:10:09 +0000

முடக்கி விடவில்லை உலகம் என்னை
முடங்க விடவில்லை நானும் மனதை
எழுந்து நடைப் போடுகின்றேன் ஜெயமாக
எண்ணம் என்ற உந்துதலில் நினைவாலே
சிறகை விரித்தேப் பறக்கின்றேன் வானிலே
சிரத்தை கொஞ்சம் எடுக்கின்றேன் வலியிலே
கொஞ்சமும் இல்லை என்னுள் ஊனம்
என்றே சொல்லிடும் தன்னம்பிக்கை மனம் .
-- பிரவீணா தங்கராஜ் .

ரொட்டித்துண்டு

Praveena Thangaraj — Thu, 20 Jun 2024 13:50:00 +0000

அடுமனை அருகே
நிச்சயம் உணவிருக்கும்
ஈன்ற குழந்தைக்கு
உணவைத் தேடி
ஓடித் தான் புறப்பட்டேன்
கண்டேன் கவலையுற்றேன்
ஒரு சிப்பம் அடங்கிய
ரொட்டித்துண்டுகள்
இருக்கவே செய்தன ...
கூடவே ,
பிறந்த சில மணித்துளிகளான
குழந்தையும் தான் .
யாரோ யாருடனோ கூடலில்
பெற்ற குழந்தை தான்
அவ்வழி சென்றவர்கள் எல்லோரும்
'எந்த நாய் ஜென்மங்கள் இப்படி
பெற்றெடுத்து குப்பையில்
போட்டனர்களோ ' வென
சொல்லாமல் இல்லை
சிறிது நாழிகையில்
இறந்த சிசுவை
அடக்கம் செய்ய எடுத்துச் சென்றனர்
கண்ணில் கண்ணீரோடு
சிப்பத்தை கவ்வியபடி நான்
ஈன்ற என் ஐந்து செல்வத்தின்
முன் போட்டேன்
சண்டை போட்டாலும் பகிர்ந்தே
உண்டு முடித்தனர்
எனக்கும் உணவு இருக்கத்தான் செய்தன
ஏதோவொன்று சாப்பிட தடுத்தது
மனித குழந்தை தான் - அது ஒன்றும்
நான் பெற்று எடுத்த நாய்குட்டிகள் அல்ல ..
இருப்பினும் ஏனோ ...
ஏதோ... ரொட்டித்துண்டினை
சாப்பிட தடுத்தது .
-- பிரவீணா தங்கராஜ் .

தமிழ் மகளே

Praveena Thangaraj — Thu, 20 Jun 2024 13:20:51 +0000

தமிழ் மகளே ...
உனக்கு
மரபு கவிதையெனும்
சேலைக் கட்டவே
துடிக்கின்றேன்
முடியவில்லை
'சல்வார்' , 'சோளி' போல
புதுக்கவிதை , வசனக்கவிதையே
அணிவிக்கின்றேன் .
ஹைக்கூ-யெனும்
அணிகலன்களையும்
மாட்டிவிடுகின்றேன்
இதுவும் உனக்கு
அழகு சேர்க்கத் தான்
செய்கின்றது .
எதுகை, மோனை, இயைபுவென
சில நேரத்தில் அணிகலன்களாக
மெருகேற்ற
அணிவித்தாலும்
மாச்சீர், விளச்சீர்,
காய்ச்சீர், கனிச்சீரென
அணிகலன் புகட்டவே
ஆசையெனக்கு
என்றாவது ஒருநாள்
உனக்கு மரபு கவிதை அணிவித்து
வெண்பா அணிகலன் பூட்டி
அழகுப் பார்ப்பேன்
என் தமிழ் மகளே...
என்னுள் ஞானவொளி ஏற்று .
-- பிரவீணா தங்கராஜ் .

2018 ஆம் ஆண்டு, முத்தமிழ்க்களம் மற்றும் கம்பன் கவிக்கூடம் ஆண்டுவிழா மலரில் தேன்மழை என்னும் கவிதை தொகுப்பு புத்தகத்தில் இக்கவிதை இடம் பெற்றுள்ளது.

வெற்றி எளிதல்ல

Praveena Thangaraj — Thu, 20 Jun 2024 13:14:46 +0000

வெற்றி எளிதல்ல

காற்றுக்கு ஒலி சுமையானால்

இசை கிடைப்பதில்லை

கல்லுக்கு உளி சுமையானால்

சிற்பம் கிடைப்பதில்லை

மண்ணுக்கு ஏர் சுமையானால்

விளைச்சல் கிடைப்பதில்லை

மண்ணிற்கு மழைத்துளி சுமையானால்

நீர்துளி கிடைப்பதில்லை

தாளுக்கு மை சுமையானால்

கவிகள் பிறப்பதில்லை

தாய்க்கு சேய் சுமையானால்

தாய்மைக்கு அழகு இல்லை

வாழ்க்கைக்கு தோல்வி சுமையானால்

வெற்றி கிடைப்பதில்லை.

-- பிரவீணா தங்கராஜ் .

*செப் 2008-இல் "மங்கையர் மலரில் " பூஞ்சரல் பக்கங்களில் பிரசுரிக்கப்பட்டவை .

என்னுடைய கல்லூரி மலரிலும் பிரசுரிக்கப்பட்டது. மேலும், ஊர்த்திருவிழாவில் கும்பாபிஷேக மலர் ஒன்றிலும் பிரசுரமானது.