திருக்குறள் | அறத்துப்பால்| இல்லறவியல் | புகழ்-24

குறள்-231

ஈதல் இசைபட வாழ்தல் அதுவல்லது
ஊதியம் இல்லை உயிர்க்கு

வறியவர்க்கு ஈதல்‌ வேண்டும்‌. அதனால்‌ புகழ்‌ உண்டாக வாழவேண்டும்‌. அப்புகழ்‌ அல்லாமல்‌ உயிர்க்கு ஊதியமானது வேறொன்றும்‌ இல்லை.

• Thank you for reading this post, provide your thoughts and give encouragement. 🍁தளத்தில் கதைகளை வாசிக்கும் அன்பானவர்களுக்கு என் மனமார்ந்த நன்றிகள். தங்கள் கருத்தை comments மூலமாக பகிர்ந்து உற்சாகமூட்டவும். பேரன்பும் நன்றிகளும்.🍁  

குறள்-232

உரைப்பார் உரைப்பவை எல்லாம் இரப்பார்க்கொன்று
ஈவார்மேல் நிற்கும் புகழ்

புகழ்ந்து சொல்கின்றவர்‌ சொல்பவை எல்லாம்‌ வறுமையால்‌ இரப்பவர்க்கு ஒரு பொருள்‌ கொடுத்து உதவுகின்றவரின்‌ மேல்‌ நிற்கின்ற புகழேயாகும்‌.

குறள்-233

ஒன்றா உலகத்து உயர்ந்த புகழல்லால்
பொன்றாது நிற்பதொன் றில்

உயர்ந்த புகழ்‌ அல்லாமல்‌ உலகத்தில்‌ ஒப்பற்ற ஒரு பொருளாக அழியாமல்‌ நிலைநிற்க வல்லது வேறொன்றும்‌ இல்லை.

குறள்-234

நிலவரை நீள்புகழ் ஆற்றின் புலவரைப்
போற்றாது புத்தேள் உலகு

நிலவுலகின்‌ எல்லையில்‌ நெடுங்காலம்‌ நிற்கவல்ல புகழைச்‌ செய்தால்‌, வானுலகம்‌ (அவ்வாறு புகழ்‌ செய்தாரைப்‌ போற்றுமே அல்லாமல்‌) தேவரைப்‌ போற்றாது.

குறள்-235

நத்தம்போல் கேடும் உளதாகும் சாக்காடும்
வித்தகர்க் கல்லால் அரிது

புகழுடம்பு மேம்படுதலாகும்‌ வாழ்வில்‌ கேடும்‌, புகழ்‌ நிலை நிற்பதாகும்‌ சாவும்‌, அறிவில்‌ சிறந்தவர்க்கு அல்லாமல்‌ மற்றவர்க்கு இல்லை.

குறள்-236

தோன்றின் புகழொடு தோன்றுக அஃதிலார்
தோன்றலின் தோன்றாமை நன்று

ஒரு துறையில்‌ முற்பட்டுத்‌ தோன்றுவதானால்‌ புகழோடு தோன்ற வேண்டும்‌; அத்தகைய சிறப்பு இல்லாதவர்‌ அங்குத்‌ தோன்றுவதைவிடத்‌ தோன்றாமலிருப்பது நல்லது.

குறள்-237

புகழ்பட வாழாதார் தந்நோவார் தம்மை
இகழ்வாரை நோவது எவன்

தமக்குப்‌ புகழ்‌ உண்டாகுமாறு வாழமுடியாதவர்‌ தம்மைத்‌ தாம்‌ நொந்துகொள்ளாமல்‌ தம்மை இகழ்கின்றவரை நொந்துக்கொள்ளக்‌ காரணம்‌ என்ன?

குறள்-238

வசையென்ப வையத்தார்க் கெல்லாம் இசையென்னும்
எச்சம் பெறாஅ விடின்

தமக்குப்‌ பின்‌ எஞ்சி நிற்பதாகிய புகழைக்‌ பெறாவிட்டால்‌ உலகத்தார்‌ எல்லார்க்கும்‌ அத்தகைய வாழ்க்கை பழி என்று சொல்லுவர்‌.

குறள்-239

வசையிலா வண்பயன் குன்றும் இசையிலா
யாக்கை பொறுத்த நிலம்

புகழ்‌ பெறாமல்‌ வாழ்வைக்‌ கழித்தவருடைய உடம்பைச்‌ சுமந்த நிலம்‌, வசையற்ற வளமான பயனாகிய விளைவு இல்லாமல்‌ குன்றிவிடும்‌.

குறள்-240

வசையொழிய வாழ்வாரே வாழ்வார் இசையொழிய
வாழ்வாரே வாழா தவர்

தாம்‌ வாழும்‌ வாழ்க்கையில்‌ பழி உண்டாகாமல்‌ வாழ்கின்றவரே உயிர்‌ வாழ்கின்றவர்‌; புகழ்‌ உண்டாகாமல்‌ வாழ்கின்றவரே உயிர்‌ வாழாதவர்‌.